يېڭى توركىتاپ: «ئىسلام ۋە ئايال»- يۈزلەن تورى «ئانىلار بايرىمى» ھەدىيەسى
كىتاپتىن ئارىيە: ئانىلارنىڭ قەلبىنى ئۇتۇش
ئانىلارنىڭ قەلبىنى ئۇتۇش، بۇنىڭ ئۈچۈن ئۇلارنى رەنجىتىشنىڭ ئەكسىچە دۇئاسىنى ئېلىش، ئۇلارنى خاتىرجەم قىلىش، دەرد – ئەلەملىرىگە شېرىك بولۇش، ئاللاھتىن رەھىم – شەپقەت تىلەش، ئۇلارنىڭ ئېھتىياجىنى قاندۇرۇش، ھەتتا ئۇلارغا ئاچچىقلاپ «ھەي …» دەپمۇ سالماسلىق ۋە ئۇلارغا مۇلايىملىق – پاساھەت بىلەن سۆز قىلىش ئەڭ چوڭ ئىبادەت قاتارىدىن بولۇپ ھېسابلىنىدۇ. ئۇلارنى قايغۇغا سېلىش، رەنجىتىش، پەرزەنتلىك بولغىنىغا پۇشايمان قىلدۇرۇش، قاخشىتىش، خارلاش ۋە ئۇلارنىڭ بەد دۇئا قىلىشىغا سەۋەبچى بولۇش جەمئىيىتىمىزنى خالتا كوچىغا سۆرەپ، ھاياتىمىزنى قاراڭغۇلاشتۇرىدۇ. ئۇلارنىڭ قىلغانلىرىغا تۇزكورلۇق قىلىش چوڭ زۇلۇم بولۇپ، دەۋرىمىز ئانىلارنىڭ كۆز ياشلىرى، داد – پەريادلىرى ۋە نالە – زارلىلىرىغا ئەمەس، بەلكى دۇئاسىغا، تەبەسسۇمىغا ۋە خاتىرجەملىكىگە موھتاج. ئۇلارنىڭ دۇئالىرى ئىلاھىي مەرھەمەتنىڭ روھىمىزغا سىڭىپ كىرىشىگە سەۋەب بولۇپ، جەمئىيىتىمىزنىڭ گۈزەللىك بىلەن زىننەتلىشىگە كاپالەتلىك قىلىدۇ.
